Santiago de Compostela, 26 de febreiro de 2024. Os centros especiais de emprego de iniciativa social son entidades que teñen como obxectivo principal a integración laboral de persoas con discapacidade, mentres que as empresas de inserción laboral representan a persoas en situación de exclusión social como tránsito ao emprego ordinario. Dados os obxectivos comúns en favor da economía social, CEGASAL e AEIGA organizaron para o próximo 1 de marzo en Santiago de Compostela unha xornada de traballo para abordar a contratación reservada, profundando na importancia da dimensión social e ambiental nos contratos públicos.
Isabel Fraga, presidenta de AEIGA, e Herminio Martínez, presidente de CEGASAL, serán os encargados de inaugurar a sesión de traballo, que comezará coa intervención de Elena Barba, da Xunta de Galicia, facendo unha introdución á contratación pública reservada.
Tras Barba, tomarán parte na mesa redonda “Xestión de contratos reservados” os alcaldes de Ames, Ribadavia, Carballo e Sada, así como o concelleiro de Mobilidade e Convivencia de Santiago de Compostela, que colabora con este evento que se atopa integrado no Programa 2023-2024 da Rede Eusumo.
Tras unha pausa café e a presentación do vídeo “Folla de Roteiro para a Contratación reservada” celebrarase unha segunda mesa redonda sobre experiencias en contratación reservada en sectores específicos.
Finalmente, volverán intervir os presidentes de AEIGA e CEGASAL, que darán paso á conselleira de Promoción do Emprego e Igualdade, encargada de clausurar a xornada, que ten o dobre formato online e presencial, que terá como escenario o Salón de Actos do Cersia, en Santiago.
Por parte da Asociación de Centros Especiais de Emprego sen Ánimo de Lucro e da Asociación galega de Empresas de Inserción Laboral puxéronse en marcha diferentes iniciativas para alentar aos concellos da nosa comunidade para tomar medidas concretas para apoiar e promover a contratación responsable, reservando unha parte dos contratos públicos para empresas que demostren un compromiso xenuíno coa inclusión e a responsabilidade social corporativa. Ao facelo, non só se promove a igualdade de oportunidades no mercado laboral, senón que tamén se recoñece e valora a contribución única que fan á nosa sociedade.
Ademais, ao fomentar a contratación responsable, os concellos poden desempeñar un papel chave na construción dunha comunidade máis inclusiva e cohesionada, onde todas as persoas, independentemente das súas habilidades ou circunstancias, poidan participar plenamente na vida laboral e social.